“Escoitar os chocos das vacas da Carqueixa fai que se rompa o monótono silencio do meu, case baleiro, pobo”

Share on facebook
Share on google
Share on twitter
Share on linkedin
Share on whatsapp
Share on telegram
Share on email
Share on print

Lucía Rodríguez Fernández é Salgueiras, unha vila de Navia de Suarna e está a cursar 3º de Publicidade e Relacións Públicas en Pontevedra, na Uvigo. Colleu o noso proxecto de comercialización directa de carne de tenreira galega suprema O Sabor dos Ancares para facer un traballo da súa carreira polo que decidimos facerlle algunhas preguntas.

Lucía Rodríguez Fernández
  • Por que escolliches a iniciativa de O Sabor dos Ancares para este traballo da túa carreira?
  • Tiña moitísimas ganas de facer algo sobre O Sabor dos Ancares xa que admiro moito a vosa inciativa e a forma na que levades as redes sociais. O traballo consistía en analizar a publicidade dunha marca e pareceume a ocasión perfecta para falar de vós e facervos un pouco máis coñecidos na outra punta de Galiza. Outro dos motivos polo que a escollín A Carqueixa foi pola cercanía xa que dende o meu pobo vexo as vacas de moitos dos socios da mesma.
  • Que é o que máis che chama a atención do proxecto?
  • A repercusión que conseguistes despois do bo traballo feito na rede. Soupestes captar moi ben a atención coas vosas campañas, son moi cercanas aos seguidores e fan que se xere feedback; presentar as familias e saber a procedencia da carne que consumimos paréceme un gran acerto e tamén, sinal de confianza e transparencia. Tamén me chama a atención o sistema de pedidos e que a carne chegue en tan boas condicións aos domicilios. Pero, sen dúbida, o que máis me sorprende é o xeito no que conseguistes facer de algo tan negativo como foron os terribles incendios do 2017, unha oportunidade para Os Ancares. Fan falla máis iniciativas como a vosa para que a nosa terra non esmoreza e siga loitando por sobrevivir nun mundo no que o rural semella estar cada vez máis olvidado.
  • Que é o que resaltarías das mensaxes que mandamos a través das nosas redes sociais?
  • Pois posiblemente o das vacas felices xa que amosa a liberdade e as boas condicións nas que viven os animais. Encántame ver esas fotos e cando estou en Pontevedra fan que me sinta un pouquiño máis cerca da casa. Outra cousa que me gusta moito e que reivindicades o importante papel que teñen as vacas no ecosistema dos Ancares xa que sen elas moitos prados e barbeitos estarían a monte e o risco de que houbese un incendio sería moito maior.
  • Que poderiamos mellorar?
  • Non se me ocorren demasiadas cousas xa que pra min, sodes o claro exemplo dunha boa xerencia en canto a redes sociais se refire. Ainda así, penso que sería interesante que fixésedes algún spot máis xa que vos aportaría máis visibilidade.
  • Cres que son proxectos deste tipo, sen intermediarios, os que dinamizarán o rural galego?
  • Si porque é a única forma de que as condicións do traballo sexan xustas e as persoas poidan vivir do mellor xeito posible. A agricultura e a gandería son actividades que supoñen moito esforzo pero non contan co recoñecemento que merecen; moitas veces traballan en condicións que non son óptimas e vendendo os seus produtos a prezos moi baixos, sen conseguir gañar case nada. Por iso é importante que existan proxectos coma O Sabor dos Ancares. Penso que esta é a mellor forma para que o rural sexa un lugar ainda mellor. Grazas a iniciativas como a vosa podo imaxinar un novo later nos Ancares. Escoitar os chocos das vacas da Carqueixa fai que se rompa o monótono silencio do meu, case baleiro, pobo. Fai que lembre que alén dos marcos de Salgueiras ainda queda moita vida.

Deixa un comentario