Terneira á media hora para o Ano Novo

Abre o envase ao baleiro do lote de O Sabor dos Ancares “Filetes”.

Para 4 persoas precisas:

Ovo, fariña e pan raiado para rebozar.
Un allo, unha cebola, sal e pementa negra.
Aceite de oliva.
150ml dun bo viño branco.

Adobamos os filetes con allo e sal. Deixámolos 10 minutos para que collan o adobo. Rebozamos na seguinte orde: fariña, ovo e pan raiado.

Fretimos os filetes, que queden menos pasados que unha milanesa e reservamos a metade do aceite no que os fretimos

Picamos unha cebola en juliana. Colocámola a modo de cama cubrindo todo o fondo dunha tarteira e botamos, coado, o aceite que reservamos. Engadimos 150ml de viño branco. Colocamos os filetes enriba. Engadimos pementa negra ao gusto.

Deixamos pochar todo a lume baixo MEDIA HORA. Apagamos e listo para comer.