“A xente di que o noso posto do mercado é coma unha fiestra aberta aos Ancares”

Share on facebook
Share on google
Share on twitter
Share on linkedin
Share on whatsapp
Share on telegram
Share on email
Share on print

Na Carqueixa estamos de estrea! Este mes de outubro comezou a operar a nosa propia tenda física: unha carnicería no posto 25 da Praza de Abastos de Lugo. O venres 1 abriu por primeira vez as súas portas un posto decorado evocando as paisaxes e a arquitectura tradicional dos Ancares, a marca de identidade da cooperativa. Ademais de vender ao público, dende este espazo tamén atenderemos os pedidos feitos a traves da páxina web. Conversamos con Luis Estrada Vigo, o carniceiro que atende ao público que visita este espazo.

Como están sendo estes primeiros días?
O certo é que tivemos unha boa acollida. Abrimos case de sorpresa e chamamos a atención polo bonito que é o posto e polo seu cartel. Moita xente parou a interesarse por esta nova tenda e comentounos que temos o posto máis bonito de todo o mercado de Lugo. É curioso que che preguntan pola foto que temos de fondo, e mesmo hai quen coñece as localizacións porque é de alí ou andou pola zona. Tamén é de destacar que estamos dando moito servizo online.

E que perfil de cliente tendes?
Pois o cliente habitual do mercado. Xente que xa compraba na praza habitualmente e que agora viu que hai un posto novo e veu preguntar. Levaron unha grata sorpresa.

En que vos distinguides doutros postos do mercado?
O primeiro, en que todo o que temos é produto dos Ancares. E non só vendemos tenreira. Temos outro tipo de carnes e incluso imos ter mel en breve. Na tenda imos máis aló do noso produto habitual de carne de vacún, pero sempre mantendo a aposta polo tradicional e natural.

Daquela sodes como un escaparate dos Ancares en Lugo?
Si, sen dúbida. A xente coñécenos tamén polas redes sociais e veñen preguntar por cousas que publicamos, se é certo que a nosa carne é de vaca criada en liberdade…

E cal é o produto que mellor se vende?
De momento está sendo a tenreira, porque a xente quere probala. Desa carne fannos pedidos moi variados. A xente quere ver, sobre todo, cal é a diferenza da carne de tenreira dos Ancares fronte a outras. E todo o mundo nos sinala o mesmo: que é moi tenra, que lle notan a calidade, que non solta auga ao cociñala…

Ti es quen atende á xente que se achega ao posto de O Sabor dos Ancares, pero tes moita experiencia previa no labor de carnicería, non si?
Pois si. Comecei a traballar moi novo na marmolería, pero coa crise da construción o destino levoume a traballar en Gadis, onde estiven once anos. Alí aprendín o oficio da carnicería. Non me deu medo meterme porque meu pai xa foi un gran parrilleiro aquí en Lugo e desde pequeno me ensinou como cortar a faldra e as chuletas no seu traballo. No Gadis foi onde coñecín a Luis Rebolo, un mestre carniceiro -que xa non quedan moitos!-. Foi coma meu pai no tema da carne, ensinoume todo, incluído algún segredo de carniceiro. Logo do Gadis estiven un ano en Friol. Em Traloagro, unha ecotenda con carnicería e sala de despece, onde aprendín moito sobre carne en ecolóxico. Alá foi onde coñecín A Carqueixa e ao seu xerente, Román Sánchez, e xurdiu o proxecto da carnicería de O Sabor dos Ancares. Logo de coñecer todo o labor que se fai desde a cooperativa o ‘contaxio’ foi inevitable e sentía a necesidade de formar parte deste proxecto. E aquí estamos na Praza de Abastos, abrindo unha ventá con vistas aos Ancares!

En que horario estades funcionando?
De oito e media da mañá a dúas do mediodía, de luns a sábado.

Gustaríache destacar algo do posto?
O feito de que facemos todo de xeito tradicional, co corte artesanal, sen maquinaria.

E que perspectivas tedes a futuro?
Pois só tendo en conta toda a xente que pasou para interesarse polo posto e que nos pediu datos, a verdade é que moi boas. Está habendo moitísimo interese.

Deixa un comentario