Sorprende coas túas receitas de Entroido!

Share on facebook
Share on google
Share on twitter
Share on linkedin
Share on whatsapp
Share on telegram
Share on email
Share on print

É difícil datar a orixe do Entroido. Podemos situalo nas festas gregas en orixe a Dioniso, o deus do viño, nas lupercales romanas e, mesmo, hai historiadores que o levan ata Exipto ou Sumeria. Sexa como fose, o que si é certo é que ten unha orixe pagá e que o nome que chegou ata nós Entroido, Entruido, Introido ou Antroido vén podería vir do termo en latín introitus (introdución) como esa idea de preparación cara a Coresma.

O que máis podemos resaltar destas datas (ademais das fermosas tradicións da nosa terra, desde os cigarróns de Laza, ás pantallas de Xinzo, pasando polos Xenerais do Ulla ou o Exército dos Panos de Mazaricos) é o consumo de carne. Como ben di o refraneiro popular: Entroido larafuzán, comíchesme a carne e deixáchesme o pan. O máis habitual é preparar cocido, pero vai unha receita para deixar aos teus comensais abraiados.

Filloas recheas de carne e champiñóns

Ingredientes para 4 persoas:

  • 500 gr de carne Carqueixa ben picadiña
  • 400 gr de champiñóns naturais ben picados
  • 1 cebola, 1 tomate, 1 dente de allo
  • Brandy
  • Nata
  • Queixo de Arzúa-Ulloa
  • Queixo parmesano
  • Filloas

O primeiro son as filloas.

É certo que hai moitos xeitos de facelas pero nós ímosche dar a cantidade perfecta para que queden saborosas para cociñar con elas, para rechealas con salgado ou para sobremesa. Se segues ben a receita tamén verás que se conservan ben, sen poñerse duras, varios días.

Dámosche as cantidades para un litro, de xeito que che cheguen para a receita e tamén para sobremesa:

  • 1 litro de auga
  • 1 culler sopeira de sal rasa
  • 500 gramos de fariña
  • 8 ovos
  • 200 gramos de leite
  • Touciño

Elaboración

Morneamos a auga con sal a 30 graos (é moi importante non poñer a auga fría). Misturamos a fariña (para isto podemos axudarnos dun robot ou batidora). Engadimos o leite, deixamos descansar mínimo dúas horas, e mellor se podemos agardar a catro. Batemos os ovos e mesturamos. Untamos o filloeiro ou tixola con touciño e botamos. É certo que o almoado ten que estenderse ben, se vos pasades de medio cucharón, quedarán grosas como postre, pero para esta receita convén que queden algo grosas, polo que debedes botar algo máis da metade do cucharón.

Recheo

Unha vez tedes as filloas, poñémonos co recheo. Debedes poñer a pochar nunha tixola 1 cebola, un dente de allo e un tomate. Mentres, adobade a carne de Carqueixa con sal e algo de pementa negra. Limpade e picade os champiñóns. Engadide todo. Cando estea cociñado e notedes a tixola moi quente botade un chorriño de brandy e deixade evaporar.
Cando estea listo collede as filloas e poñede no centro dúas culleres do recheo. Alzade os laterais e facede un fruncido. Suxeitade cun mondadentes.

Collede un recipiente para o forno. Botade no fondo nata, colocade os saquiños que se formaron coas filloas e engadide polo medio tacos de queixo Arzúa- Ulloa. Guindade por enriba de todo parmesano raiado.

Metédeo no forno a 150º con calor inferior. Cando vexades que o queixo de Arzúa se fundiu coa nata e fai burbullas está listo para sacalo.

Que aproveite!!