Nós traballamos para que ti quedes na casa

Nos últimos tempos vivimos un desmantelamento xeral da estrutura produtiva do sector primario. Isto é contradictorio coa situación que estamos a vivir. O goberno anunciou a posibilidade de pechar as fronteiras o cal deriva na evidencia de que teremos que alimentarnos de produtos de proximidade e producidos no Estado. Isto, á súa vez subliña a importancia do sector primario e de ser un país produtor e non importador.

Por iso queremos dedicar este post a todas e todos os agricultores e todas e todos os gandeiros porque eles continúan a traballar arreo, esforzándose, camiñando, madrugando para que o resto da sociedade poida ter un maior benestar dentro do Estado de Alarma. As persoas da sanidade, dos servizos sociais, as traballadoras dos supermercados son indispensables pero as e os traballadores do sector primario tamén. Estamos vendo que todo o vinculado coa educación, a cultura e o ocio pode agardar pero a comida non.

Tamén queremos dedicalo a todas as persoas que seguides as nosas redes e mandarvos ánimos na corentena. Lembra que nós continuamos traballando para que ti quedes na casa. Tamén nos gustaría pedirvos aos que vivides en grandes núcleos que sexades responsables e respectedes as normas porque é fundamental que o rural estea limpo do COVID-19 para que poida continuar a ser produtivo.

Tamén che lembramos que podes facer o teu pedido na nosa tenda online se queres evitar as aglomeracións dos supermercados.

Ánimo! Entre todos habemos virala!