Carta dunha clienta do Sabor dos Ancares

Share on facebook
Share on google
Share on twitter
Share on linkedin
Share on whatsapp
Share on telegram
Share on email
Share on print

Esta é un texto de agradecemento que enviou Paula, unha clienta da Coruña a Román, o noso xerente. Emocionounos moito polo que decidimos compartila con todas e todos vós.

Quería aproveitar por darvos os parabéns polo voso proxecto. Como coidades os animais, o monte, o rural… E ao mesmo tempo permitirnos á xente que non temos a sorte de vivir nun lugar tan marabilloso coma o voso degustar desta carne. É un privilexio pra nós.

Na nosa casa criamos aos nosos animais, polos e coellos, o mellor e máis natural que podemos. Iso é a base de carne da nosa alimentación, pero gústanos tamén de cando en vez comer algo de tenreira, sobre todo ao meu compañeiro que é arxentino e un “asadito” ten que facerse cada pouco. Eu son vexetariana de fai máis de 20 anos, pero entendo e respecto que as persoas coman o que precisen sempre que os animais sexan respectados na súa vida e na súa morte.

Entendo, desde que vivo no rural, hai máis de 10 anos, que os animais son necesarios e imprescindibles. O problema é a industria cárnica que só mira polos beneficios económicos e por nada máis.

Teño dous fillos pequenos e os dous foron libres de escoller a súa alimentación, como o fun eu, intentando ofrecerlles sempre a mellor calidade posible tanto na carne como no resto. Xa desde ben pequenos entenden que hai que comer de tempada e a ser posible de proximidade, e tamén que a nosa comida non pode saír da explotación nin animal nin humana. Por todo isto cando vos coñecín, case de casualidade, polo Facebook, non dubidei en facervos o pedido. Estou moi contenta de coñecer que, na nosa terra, ao fin hai xente que vai entendendo que hai que xuntarse e valorar o bo que temos pra que así o coñeza todo o mundo e o valore, así facemos país e facemos rural, que na Galiza van da man.

Nós visitamos polo menos unha vez ao ano os Ancares ou o Courel, así que nalgún momento intentaremos irvos coñecer persoalmente a vós e as vosas fermosas e felices vacas.

Moitísima sorte en todo este proxecto cooperativo.
Un saúdo moi afectuoso desde o rural da Coruña. Desexando recibir o pedido. Penso que este é o inicio dunha durareira “amizade”.

Bicos de
Paula
Fede
Artai
Hiar

Deixa un comentario